*గరుడునిపై..గోవిందుడు..!
* గరుడవాహన సేవలో ప్రముఖులు
* వేలాదిగా తరలి వచ్చిన భక్తులు
భక్తుల గోవింద నామ స్మరణలు.. అడుగడుగునా కర్పూర హారతులు.. కళాకారుల వేషదారణలు.. భజన బృందాల నృత్య ప్రదర్శనలతో శ్రీవారి గరుడోత్సవం వైభవంగా జరిగింది. తుమ్మలగుంట లోని శ్రీ కళ్యాణ వెంకన్న గరుడోత్సవం శనివారం రాత్రి అత్యంత శోభాయమానంగా సాగింది. తిరుమల వెళ్ళి గరుడోత్సవంను వీక్షించలేని వారందరూ తుమ్మలగుంటలో జరిగే గరుడోత్సవాన్ని కనులారా వీక్షించి భక్తి పారవస్యం చెందారు. చుట్టు పక్కల ప్రాంతాల నుంచి వేలాది మంది భక్తులు తరలివచ్చారు. కోలాటాలు, చెక్కభజనలు, పిల్లనగ్రోవులు, కేరళా వాయిద్యాలు, గోవింద నామ స్మరణల మధ్య స్వామి వారి గరుడ వాహన సేవ కన్నుల పండువుగా సాగింది. గరుడ వాహన సేవలో ఆలయ వ్యవస్థాపక ధర్మకర్త , చంద్రగిరి ఎమ్మెల్యే చెవిరెడ్డి భాస్కర్‌రెడ్డి, చెవిరెడ్డి లక్ష్మీ దంపతులు ఆలయ ఈవో సుబ్బరామిరెడ్డి, ఆలయ వాహన ఇన్‌స్పెక్టర్ బాబురెడ్డి, ప్రకాష్, భక్తులు పాల్గొన్నారు.
