సర్పంచ్ నవ్య, రాజయ్య ఎపిసోడ్‌లో బిగ్‌ట్విస్ట్.. నోటీసులిచ్చిన పోలీసులు
- సర్పంచ్ నవ్య, తాటికొండ ఎపిసోడ్‌లో బిగ్‌ట్విస్ట్
- సుమోటోగా స్వీకరించిన జాతీయ, రాష్ట్ర మహిళా కమిషన్లు
- నవ్యకు నోటీసులిచ్చిన పోలీసులు
స్టేషన్ ఘనపూర్ ఎమ్మెల్యే తాటికొండ రాజయ్య, జానకీపురం సర్పంచ్ నవ్య ఎపిసోడ్ కొత్తమలుపు తిరిగింది. రాజయ్యపై సర్పంచ్ నవ్య చేసిన వేధింపుల ఆరోపణలను జాతీయ, రాష్ట్ర మహిళా కమిషన్లు సుమోటోగా స్వీకరించాయి. విచారణ చేపట్టి నివేదిక అందించాల్సిందిగా పోలీసు అధికారులను మహిళా కమిషన్ ఆదేశించింది. దీంతో పోలీసులు కూడా నవ్యకు నోటీసులు జారీ చేశారు. ఈనెల 21న రాతపూర్వకంగా పోలీస్ స్టేషన్‌లో ఇచ్చిన ఫిర్యాదుపై ఇంకా ఏమైనా సాక్ష్యాధారాలు ఉంటే రెండు రోజుల్లో సమర్పించాలని ధర్మసాగర్ సిఐ రమేష్ ఆమెకు నోటీసులు ఇచ్చారు.
రాజయ్య తనపై లైంగిక వేధింపులకు పాల్పడ్డారంటూ కొద్దిరోజుల క్రితం సంచలన ఆరోపణలు చేసిన నవ్య.. ఈనెల 20న ఆయనపై మరోసారి తీవ్ర ఆరోపణలు చేశారు. గ్రామాభివృద్ధి కోసం ఇస్తానన్న రూ.20 లక్షలు, ఇవ్వకపోగా అప్పుగా తీసుకున్నట్లుగా పత్రంపై సంతకం పెట్టాలని తనపై తీవ్ర బెదిరింపులకు పాల్పడుతున్నారని ఆమె ఆరోపించారు. ఎమ్మెల్యే వర్గం ఒత్తిడికి తన భర్త తలొగ్గి సంతకం పెట్టాలంటూ తనను ఒత్తిడికి గురిచేస్తున్నారని ఆవేదన వ్యక్తం చేశారు. గ్రామాభివృద్ధి కోసం ఇస్తానన్న డబ్బులు అప్పుగా ఇస్తున్నట్లుగా చెబుతూ పత్రంపై సంతకం పెట్టాలని ఒత్తిడి చేయడం సబబేనా ? అని నవ్య ప్రశ్నించారు.
ఎమ్మెల్యే వేధింపులకు సంబంధించి తన దగ్గర అన్ని ఆధారాలు ఉన్నాయన్నారు. వేధింపులపై మూడు నెలల క్రితం క్షమాపణ చెప్పిన ఎమ్మెల్యే రాజయ్య.. గ్రామాభివృద్ధికి రూ.25 లక్షలు ఇస్తానని చెప్పి నయాపైస ఇవ్వకపోగా తనకు ఇచ్చినట్లు ప్రచారం చేస్తూ బాండ్ పేపర్ పై అప్పుగా 20 లక్షలు తీసుకున్నట్టు సంతకం పెట్టుమని వేధిస్తున్నారని ఆరోపించారు. ఈ మేరకు భర్తతో కలిసి ఈనెల 21న స్టేషన్‌కు వెళ్లిన ఆమె.. ఎమ్మెల్యే రాజయ్యతో పాటు తన భర్త ప్రవీణ్, ఎంపీపీ నిమ్మ కవిత, ఎమ్మెల్యే పీఏ శ్రీనివాస్‌‌పై పోలీస్‌స్టేషన్‌లో ఫిర్యాదు చేశారు. ఆ నలుగురు తనను మానసికంగా వేధిస్తున్నారని.. వారిపై చట్టపరంగా చర్యలు తీసుకోవాలని పోలీసులను కోరారు. తాజాగా.. కేసును జాతీయ, రాష్ట్ర మహిళా కమిషన్లు సుమోటోగా స్వీకరించగా.. నవ్య ఏ విధంగా స్పందిస్తారో వేచి చూడాలి.
